04.12.2018 17:10 Лайт
ЯРЬОВАНЯ (Весна)
1.Из стріхы начало цяпати,у хыжи ся через фіргонкы пробивать яркоє сонце,дись у глуши старый дідик зорвав папірчик на калиндарьови из 28 лютым,кінчилася зима,у каждів хыжи весну стрічавуть фразов «Слава Богу штось ме зиму перебыли!»
2.Всьо!Типир ся начинать новоє життя!
Весна для закарпатців сама любима пора.Як ся у деревах начинать сокодвіженіє,так у нашых людьох начинать бігати кров и кожа играть вбы собов рушати штось чинити.Двором ся ходить узад уперед- йсе ревізія што вже мош чинити.Очи ся радувуть грядці з чисноком и цибульов,бо вже убило зеленоє.Боковоє зреніє тоже періодично стрілять у сусідські дворы ош баци там ся вже штось садило?
3.Косичарі устелили первоцвітами и тюльпанами усі входы на базарах.Цілу зиму они вставали уночи класти вгня у теплицях,вбы йсю весняну красу чоловікы дарили жонам на 8 Березня.Яка была жура кой хотіли вдмінити сисе сято!Но нич,голландські цибулі продовжавуть дарити весняноє настроєніє закарпатськым жонам,а тым ко їх угнав- заробіток.
Нагадаємо, закарпатці жартують: як у краї святкують весілля.
4.На базари уже продавуть зелену цибулю,пучкы редискы. Заріччани уносять першу капусту.Пішла перша купійка!Усі сферы бізнеса на Закарпатті послє зимнього застоя начинавуть оживати.Схема така:продали редиску-купили дітьом обновкы-у кого купили ,тот пішов на стройматеріалы,бо начинать ремонт-бізнесмен из бовта стройматеріалів купив дітіні біциґлі-майстер што чинить ремонт,тоже гроші дись покітить,вобщем гроші ся на Закарпаттю фурт зараблявуть и фурт ся кітять.Завто добре всьым,усьо має свою ціну.
5.Ранньов веснов треба встигти зобрати березовый сок(вадь купити у люди).Базароші завозять нові колекції цуря и обуви,но люди щи ни куплявуть,лим ся приникавуть.Мега торговля буде в великонну п’ятницю,и американці из свойов блекфрайдий най ся ни хвалять!Бо наші люди будуть брати самоє паранноє и самоє дорогоє,а ни остаткы по знижці.Файный базар типир на пітята,бо всі беруть вбы была домашня куриця в левеш тай домашні яйця. Жоны вже ревуть у телефон чоловікам што на заробітках,вбы загнали мало гроши,бо дітьом до школы нішто вбути тай нізашто пітят купити.
Свинята ся поросять,коровы ся тилять,квочкы сидять на яйцьох.
У мачок марціуш ,вывуть ги збісні,псы на них гавкавуть так ош ланц їх душить, діти ревуть кидь пропав мацур на тыждинь ,а пак біжать ид ветеринарови лічити того подертого гуляку,котрый участвовав у всьых битках на улици.
6. У яри в каждому закарпатцю пробужаться агроном.Ци має гектары,ци сотины,ци лем пару грядок,ци на балконі пару горничків из зимльов,каждый бы штось садив.
Вариські што ни мавуть зимлі,біжать у село на старовину штось ярьовати вадь купувуть дачу.Купуєся ушитка розсада и насіння.У бовтах типа «Огородник» усі покупатєлі як доктора хімічных наук-коли ся вни сьому навчили? У каждого в дворови ботанічный сад.На Новів пошті тоже двіжняк садоводів,иде обмєн сортами по цілів Украйні.Усьо ся садить за мотузком,бо вто ганьба кидь шоры кріві. Малюнкы Наска вто лупина пиля того ,як упозирувуть руні закарпатські грядкы ,засажені поля з высоты польота. Шкода, вбы зимля пустовала,кидь є рукы,што садили бы.
Нагадаємо, в Ужгороді у петанк можна пограти з дикою лисицею.
7.Тракторы повным ходом орють,дискувуть, фризувуть.Усі файтами на дарабах,доста вбы яден кось первый посадив крумплі,такой за ним забиваться в зимлю уся крумпля з того населеного пункта.Самотні жоны в пошуках того,ко бы з’аршовав города,в’брізав лугош ,с’формовав дерева,туї.Луґош вто вобще лице ґазды и символ Закарпаття:має лоза витися руно,має быти вініґа вбрізана по сезону,сам луґош из акуратної арматуры,а не з отходів ся чинить,має быти высокый,вбы ся бусик типа Спрінтера ставав,грезна пак мавуть тоже вісіти великі,не хворі.
8.Типир усі хыжні пириходять на закарпатськый фастфуд:скыба з олойом,солонина,аджіка,даколи смажені крумплі,бо варити їсти ніколи.Діти си самі варять пильмині вадь ратоту.Чим майскорі треба всьо забити в зимлю.Стара бабка, што лежала крекнучи цілу зиму, з переязаным попереком шмотлавучи з паличков йде на дараб тоже садити,бо зимля дає прилив сил!Типир ниє коли хворіти,бо треба поярьовати! Канєшно, людськый поперек ни розрахованый на закарпатську нагрузку, завто Вольтарены, Доларены ,Фастум гелі купувуться пачками в аптеках.Дохторы вже одкрыли сезон апендицитів и каміня в почках .Сараку кось ся вже наярьовав!А позвоночні грыжі нико ни лічить,а нашто?Мож тото потихы й забоком ся схыляти.
9. Дерева зацвіли!Боже,яка краса!Приближать ся Великдінь и оп’ять треба мыти возоры,мальовати городину у кого ни з кованя,полоти кішкерт.Город засаженый,чиниться генеральна уборка.Щи до Великдиня треба укласти кусіці на балкон,так ги у Мадярщині,бо йсе закарпатськым жонам дуже ся любить.Но кусіці ліпше жоны купувуть без чоловіків, вбы не знали ціны и не мийриґовалися,бо щи бы ся сповідати.Треба щи побілити дерева,побрызкати персикы синьым.У дворах уже и так краса: цвітуть тюльпаны,нарцисы,сірень,мімоза,розы,гіацинты.Двір,кутиць,пудвал,гараж,майстирська кідь є, усьо ся дуже вхарює и білить,бо на Великдінь буде ся сюды водити гостів на показ.Уся уборка має ся завершити у чистый читвирь и треба ся посповідати.
10.Христос воскрес!!!Закарпатці сятять Паскы.Кажда дітина має окремо складену кошарочку из кіндером.Шовдарі так пахнуть из кошарок,а сийночноє щи йде...Закарпатці так ся натрудили до сього великого сята!Многі щи й піст держали!Но Бог їм завто пошле файный урожай!А жоны уже три дны варять їсти!А колачі які назад домашні напекли из того рукописного зошита!Усьо Закарпаття на Великдинь заходить у затяжні гостины,бо треба вбыйти всіх кумовів и пак приняти у себе.Треба роздати подаркы и зобрати подаркы.У каждів хыжи указувуть раз город як посадили,пак худобу яка є, пак инше.Гостьова комісія усьо дуже хвалить(пак бо щи бы ся гостити).Жоны мижи собов домовлявуться за бартер косиць-котра які гонна вдкопати другів.За столом любима тема за субсидію, кому як нараховали ,пак за політику...
11.Сакуры!!!Закарпаття наповнилося туристами.По санаторіям усьо приєзжі люди,які ся чудувуть чого месні ни оздоровлювуться.Закарпатці просто ни мавуть часу ити в санаторій,їхньоє оздоровлення ото пити мінералку и фурт быти на свіжому воздусі.А кидь подумати та мы всі модні процедуры проходиме на кирті:перемерзись у зимі,докідь чистив курник вадь розгрібав сніг -туй ти кріосауна,коплеш ягоды у жару-туй ти фінська сауна,ходиш босый по траві-туй ти тайськый масаж, поливаш курячками,коплешся в зимлі-туй ти грязьові ванны,везешся по ямах-туй ти антицелюлітный ліфтинг.У нидільку файно мош піти д ріці спичи солонинку з крумпликами,вадь шашлик з цімборами,бо треба набратися сил на новый трудовый закарпатськый тыждинь.По музиці мош оприділити вік компанії,што оддыхає.
В кінци весны великоє сято у Міжгірю-женуть баранів на полонину! Народу много,особенно з Ужгорода чиновників різного ранґу.Усі ся фоткавуть из вівчарьом,из бараном,лізуть на стовпа за чізмами по давнів традиції,хоча типир дівка вд хлопця чекать ни чоботы а айфон.
12.Май місяць уже радує чиришнями и начинавуться ягоды.Виноградівщина перетворюєся на Біржу праці-беруть у нопсам збирати ягоды усьых.Платня стабільна,погодинна,велика.Ягоды забиравуть оптом и на них битка на базарі.Кой заїзжає з ягодами машина та скупщикы лігавуть на капот и гойкавуть : «Це все я вже купиииивввв!!!!».Што файно йде на базари веснов ото другі беруть на замітку и пак усьо ся засажать тым продуктом.Ко ся не ліновав и насадив ягоды гектарами,тот ся типир возить на джіпови.
Наярьовалися закарпатці доста!Уже бы копати, вбгрібати, полоти, поливати, пасемковати, удобряти, брыскати дачим ...Потихы ся появлявуть грибикы та у Фейсбуці ся чуствуєш ги бысь быв у хащи.
Заходить літо и ...
**************************************
Маріка Данканич
04.12.2018
Читайте також якими справами займаються краяни взимку.
Читайте на ГК:Реконструкція у Виноградові триває: запрацював музичний фонтан (ФОТО)