Приводів аби перехилити чарку у закарпатців достатньо в будь-який час.
Про це в мережі Фейсбук розповіла користувачка Маріка Данканич:
НИ ЛЕГКА ДОЛЯ У П’ЯНИЦІ
Ко ни має в родині того,ко любить упити? Айно,такых ниє.
Наш край ся тым и славить,што мы дуже любиме силовати.Щи піціцьків дітині старожилы советувуть замачати цуцлик у палинку вбы май спало.
У нас на Закарпатті фурт гостины,фурт якісь алдомаші за доброє діло,поводів упити тілько,што печінка робить в режимі 24/7.Увеличена печінка на Закарпатті вто ни ганьба,вто елементарно. А як ся удержати вд питя ,кой:
-зарізали свиню,алдомаш
-зорали,алдомаш
-посадили,алдомаш
-убстригли луґош,алдомаш
-сусід зайшов поточити балту,закликав на дегустацію вина
-вы до сусіда пішли за тачков,закликали го на кавиль(но йсе мы всі знаєме ош лим кавильом ся вто ни вбыйде)
-прийшла сусідка зміряти давлєніє та вже го пак регулювуть питьом: ци вбаляти,ци пуднимати
-докідь у бочці є вино и самогонка повод ся все найде....,а як ни як ганьба ни упити, кидь тя силувуть в гостях- повага до ґазды в пріоритеті.
Уд частых алдомашів чилянник потихы привыкає пити и пак го всі обзывавуть ош він п‘яниця,бо любить ся напити.Пак а ко в тому винный?Не лиш він сам.Виноваті наші традиції и наша гостинність.Добре в Америці-там ся зберуть анонімно дись у клубі,посідавуть на стільчикы довкола и гордо заявлявуть ош они алкоголікы,бо тіпа їх тягне д погарови пива раз на тыждинь! Де наша чилядь сякоє вкаже?Даже кому ампулу зашивавуть ,уже личить дны кой годен буде пити йзясь ,айбо ниґда тот ни вкаже ,ош він алкоголик.Кось колись зазирнув у душу тому п’яницьови ош чого він п‘є?А зря.Там ся мош рыти доста.
Які філософські выводы про життя выговарює чоловік на п’яну голову! Готові афоризмы. Просто так він ся ни напив-ото была реанімація душі! У нього быв великый стрес,бо гроши ниє в хыжи,на роботі проблемы, вадь ниє роботы,пошкодовав цімбора та случайно ся з ним сам напив,палинка ся попала ліва та вхопила го,закускы нормальної ни было,тот ко наливав мав тяжку руку,такый го чоловік покликав пити што ни міг му удказати,ни хотів лишаты в склянці на слызы,знав ош жона го дома буде пиляти....Склянка палинкы вадь графін вина ото ліпші психологы для ранимої душі!
Мы проходиме пиля лежачого п‘яного равнодушно ,бо щитаєме ош він свиня.
А межи иншым п’яниці великі романтикы!Они й косиці куплять своїв коханів,и човколаду,а кілько золота куплено в ювелірці чоловіками після п‘янкы свойым жонам ,вбы загладити свою вину!А шубы?Половина жін шубу має лим позад того ош чоловік ся быв напив.Друга половина жін устигла удурити гроші до п‘янкы,докідь ни пропив.
Як тяжко на гостині п‘яницьови,кой силувуть слабо,питя перед очима,айбо сам си ни наллє.Жона го вже й так пуд столом дюґать вбы ни пив тілько,айбо палинка, ги слыза з душі ллєся в горло.А дале прогрівать усі закаулкы в душі,начинаться ностальгія за всьым...и вже ся хоче заревати пуд час проголошення очередного тоста.Такого прозріння в політиці и держуправлінні ниє ни в яннів телепередачі ги є за столом,куй ся п’є!Щи хуже кой п‘яниця п‘є дись без жоны.Кілько раз він дрожащов руков збивать дзвонок уд жоны!
Вы думаєте йому вто легко даєся?Ци она си уявляє яка у нього товды тахікардія?Їв добре звонити з теплої хыжи,її ни мучить совість,їв лем бы погойкати,а він після каждого збитого дзвонка мусить упити вбы ся вспокойити.
Якый ото стрес великый набратися сил прийти домі,а там учути: «Де ття чорти носили?...Десь ся так нажер?...Што палинкысь голоден?...Ни ганьбишся уд діти?...Спи типир убратый тай убутый я в тя свистала!...Здри на ся нальоґавись ся ги свиня!!!»Дуже часто він воліє вообще ни йти домі,а ліпше дочекати кой жона го піде глядати.Скандал по любому буде,айбо хуть домі ся приведе з бодіґардом.
Безплатна доставка до порога,лем кур’єр дуже гойкать так,што голова тріщить.Жоны мавуть піти на курсы з психології и навчитися говорити в таків ситуації сяк: «Слава Богу штось дома чоловіче!...Знявись добре стрес ци щи ти мало налляти?...Най ти наскоро штось иссмажу закусити....
Ни журися ,діти вже сплять та ни ввидять тя сякого...Дай най тя ззуву сонечко...На парночку пуд голову...» А ранинько чайчику з лимоном дати и мінералкы.Йому й так пійло никати в очи жоні.Усьо што рано жона вкаже йому и так по фен-шую,так што най ліпше біжить даяку поливку варити.
Чого у Трудовому кодексі ни подумали за п‘яницю и ни уднесли го до категорії тимчасово-непрацездатных-яка з нього робота на другый динь?Чого він ся має мучити на роботі з головнов больов и пачками жвати Орбіт?
Выдати лікарняный и написати ош печінка ни справилася из переработков алкоголя ,изза чого він сараку типир ся мучить з супутніми симптомами.И вобще понеділок для нього має быти выходный,а п’ятниця скорочена.Най добре здойнє тягар з души.Він пак нажене роботу....
Вобщем ни легка доля у п’яниці.Раз треба найти повод упити,пак што упити,пак з кым упити,пак из жонов ся поссважати,пак їв компенсіровати її неспану ніч,пак утирпіти головну біль...и назад найти повод.
***********************************
Маріка Данканич
05.01.2019р.
Р.S.Начинаться Різдво та сокотіться на гостинах!
Нагадаємо, закарпатці жартують: як у краї святкують весілля.
Читайте на ГК:Трагічна звістка сколихнула все Закарпаття (ФОТО)Читайте на ГК:“Косили” під волонтерів: на Виноградівщині затримали хитрий “квінтет” (ВІДЕО)
Читайте на ГК:На березі Тиси у підніжжя Чорної гори: дорадянська історія Севлюша — Виноградова (ФОТО)