Закарпатці жартують: якими справами займаються краяни взимку

В мережі розповіли про свята та будні й робочі дні у році для закарпатців.

Про це в мережі Фейсбук розповіла користувачка Маріка Данканич:

СЕЗОННІ РОБОТИ ЗАКАРПАТЦІВ
На Закарпатті не принято сидіти без діла.Уд малого до старого чилядь собов б’є , товче,каждый си найде якоєсь діло.Я попробую описати што чинять закарпатці цілый рік.Йсе буде пуд хештегом чотыри сезоны.

ЗИМОВАНЯ

1.Прийшла зима и начинавуть потихы приїзжати заробітчани из світа.У сім‘ях благодать,свады ниє,бо є гроші,діти вд Миколая чекавуть планшеты и нові смартфоны.Базары загуділи торговльов,бо нянько ,што прийшов из чехів, ушитко купує дітьом и жоні.

2.Жоны ся журять коли встигнуть до Різдва перемыти возоры и фіргонкы(шторы) тай припарадити хыжу ги типир модно.Бабкы дись пиля шпора потихы лущать пасулю.Типир прясти ни треба ги давно, та мош час убити в соцмережах.По скайпу вадь по вайберу звониться д свойым близькым,усім ся каже «Прийдіть колядовати».Типир ся їсть закладованя,но кажда дітина знає што раз ся бере прошлорічноє доїдати.

3.Заріччани,кумнятські,оніцькі засівавуть парникы,сись регіон у Закарпаттю мош сміло назвати Сектор Ґаза,бо реально без противогаза там тяжко проїхати-всьо в дымови.У Виноградові поля засажені ягодами та мош типир мало ся розслабити.У мадярськых селах тоже спокій,бо тракторы ????, што купили за мадярські гроші,до весны стоять без роботы.

4.На бізнес-арену выходять гірські районы:Воловець,Свалява,Рахово,Березный.Из першым снігом туй начинать всьо оживати.Туристы приїзжавуть грошовиті и у высокый сезон туй усьо йде на ура,люба скошена трава презентуєся як цілющый чай уд усьых хворот.Брынза,овечый сыр и грибы потихы збагачувуть месноє населення.
На Новый рік у сих районах аншлаґ,усьо забито туристами.

5.Скоро Різдво,а значить треба різати свіні.Типир главноє найти гентеша.Коли ся ріже свиня треба кликати сусідів подержати вто животноє.

Йсе дуже велика обіда кидь вы якогось сусіда забыли,даколи й двадціть люди по кутцьови ходить.Первый дараб мняса бере ґаздыня изсмажити свіжины.

Всі,ко держав свиня,приступавуть до трапезы,пробуєся молодоє вино,гентеша хвалять за роботу.Усі лаворы по хыжи умащині,топиться масть,набиваться пікниця, гуркы,солиться солонина й шовдарь будити.Півсвині ся роздасть мижи свойыми,бо така традиція.По солонині судять,які ґазды,кидь на свини солонина тонка та вто ганьба.
Пробуєся капуста,яка вже мала укыснути.

6.Різдво.Великоє сято,до якого жоны ся дуже ладять и печуть колачі(шитимині).Рецепты з Інтернета ни пудходять,бо кажда має рукописный зошит,перевіреный роками гостин ,де колачі ся называвуть «Уд Оксаны», «Стрыйнин», «Анцин мащеный», «Ллятоє уд бабкы», «Київськый по-иршавськы»...Мош колачі й купити,но закарпатська жона любить ся наробити.Діти ся типир лінувуть ходити колядовати ги давно,завто йдуть ги інкасаторы за надьожным списком: дідикы,бабкы,маточка,батичко,мати , втиць(кидь нянько мало упив та діти му колядувуть пару раз).

Сума для дітины збираться солідна,што даколи вже дітина зычить батькам гроші на дашто.

Дорослі тоже колядувуть,за столом планувуть коли йти на заробіткы,вадь якый бізнес из кумом замутити.Піціцькі діти за столом здавуть ЗНО(Закарпатськоє незалежноє оцінювання) и кажда дітина має удповісти на вопросы: «Як ся пишеш?,кілько ти років?,як каже коник?,як каже песик?,як каже коровка?» і так дале.Колядовати в Закарпаттю дуже інтересно,бо туй Різдво двычі празнувуть, и мадярськоє.

7.По різдвови начинаться інтенсивна робота в парниках для янных (пікірьованя) и мертвый сезон для базарошів, завто базароші типир масово идуть у Буковель.Типир бізнес лем у свадєбных залах,бо кончилося говіня и у таксістів,бо многі машины ся ни заводять у студени.

8.Водохреща щи яден празник и повод зустрітися,вбы пак піти до когось домі догоститися.Уже мало легше,бо половина зимы пройшло.

9.Празникы ся минули и типир мош ся мало пудлічити народнов медицинов,бо після тілького їдіня многых дись штось безпокойить.Многі закарпатці лічать поперек ,што го зорвали щи веснов.До дохтора ся принципово не йде,вто уже лиш при невідкладных станах.Самый популярный совет хворому: «Бири упий 50 грам та нич ти не буде!»

10.Зима ся продовжає,газ крутить безбожно,дрыва тоже доходять. Половина думать де бы найти газовика скрутити щотчик.Доста тяжкый період,гроші ся кільтувуть,до весны щи далеко,вбы ни впасти в депресію п‘ють вино тай сливовицю.Бусикы вдвозять заробітчан.Усі чекавуть весну з нетерпінням.
******************************
Маріка Данканич
23.11.2018

Нагадаємо, закарпатці жартують: як у краї святкують весілля.